اللي مش تايه .. واللي متخيل أنه ماسك زمام
أمره
مش هيفهم
توهة روحي .. في اركان متفككة مني وفيّ
وساعة عقاربها ما بتلدغ ولا بتدق
متعلقة على حيطة .. وحيطة متعلقة في الهوا
تسند عليها تنهار .. تركن عليك جدار
يحجب الرؤيا .. ويمنع بصيص الشمس
يخبط عليك بالليل وتقوله مين
مين هينده عليك وانت مش هنا
بلا عنوان ولا سايب حتى ذكريات بيها نعرفك
ولا مكاتيب منحوتة فيها تجاعيد معناك
متكرمشة روحك في سلة مهملات بيسموها هنا وطن
وانت تايه وشغال خيال مآتة
على طول الطريق
يمر عليك العدو أو الصديق ..
يلاقيك بتغزل خيوط حلمك بالحريق
يستنوا عليك تموت .. مبتموتش
تقوم .. ما بتقومش
تصرخ .. ما تصرخش
يسيبوك وينسوا
يسيبوك ضبابة متعلقة
في حاجة كده شكل السما
يسيبوك زي المطر
نازل شيطاني من القمر
يسيبوك برق بيشق الورق نصين .. وحي وتراب
يسيبوك غنوة حافية القدم والادين .. بتهد
الخراب
يسيبوك عطشان سراب
تايه قبل ما براك .. جواك
ضال .. ومش مشتاق لحضن الآب
مصلوب وحلم القيامة ما بيراودكش
ولا يجيلك في السهراية ولا في الكوابيس
طول الليل عمال بتقيس
طول الصحرا .. عمق البحر
بصة عينها .. وشوق الدهر
وانت التايه بين الاتنين
مستني يموت القهر
مستني تدفن خوفك بإديك
يمكن تبرد نار التوهة في قلبك
توقف نزيف حربك
والتوهة فيك مبتنتحرش
أجمل ما فيك ما بينتحرش
ليست هناك تعليقات:
إرسال تعليق