تقديم ضروري ..
منحوتة جوايا جراح
منحوت أنا جواك صباح
منحوتة جوايا حدود
منحوت أنا جواك براح
قصيدة ..
وكأني لحظة صمت مكبوتة
مليان يا صمتي بالزحام
مليان يا خوفي بالكلام
مليان يا برج الحمام
بي أنا
بغربة بتخاف الاحتواء ..
بغربة بتخاف الوطن
بشهوة بتخاف الاشتهاء ..
بشهوة بتخاف الشجن
بزحمة عاشقة الانطواء ..
بزحمة بتخاف تنسجن
بلاقيكي براية أنا
لحظة وجودي خارج صليب الاكتفاء
لحظة مداعبة اللعب
بلاقيكي براية أنا
حفظاني .. تلت حروف الأنا من الانقراض
مطرح لسكنى الاعتراض
مهرة بتهوى الانبساط والانقباض
ملعون أبوك يا موت
ملعون جمال الانضباط
يا أحلى تفاحة جنون
هاملت متردد يكون
برومثيوس يا حلم المساجين في السجون
فراغك الآتي مد الجسور
نشفت بحور
راح زمان الجدور
تثور أو لا تثور
ليلك جوه طابور النمل دور
وجوه خلية النحل دور الشغالات
ودورك جوه الجحور
حية من الحيات
لحظة ولادتك برادة حديد
يجذبها مغناطيس الممات
حياتك تنهبها الحاجة للحاجات
والحاجة أم الاختراع
موهوم يا قلبي بالانطباع
بأعشق الصبايا البور
ذروة الاشتهاء نفور
نفور .. وتبرد الأعضاء
وتعيد الاجترار تفور
مين يفهمك إلاك
واللي يفهمك .. بكره تلاقيه يهواك
بكره تلاقيه ينساك
ملعون أبوك .. شباك مفتوح تملي
ويهوذا يا ضل المسيح
ماشي معاه متسلي
بدل الفراغ والحكاوي
اختار النصيب الصالح
وده اختيار الحاوي
وده اختيار الخاوي
ويهوذا يا صدا صوت المسيح
إنت الصفيح
والدم اللي مبقع هدومك
ده نزيف الجريح
لوحة حيطانك يا خريف
ده أزهار الربيع
إنت وضيع
ملعون أبوك يا جمال القطيع
والفرار من التجسد .. هو الفرار
من الأنا
والفرار من التعدد .. هو الفرار من السما
والفرار من التفرد .. هو الفرار من الحياة والغنى
ملعون أبوك يا سجن الأنا
مين يفهمك إلاك
يا مسيح .. محتاج مسيح يهواك !!
محتاج مسيح زيك .. عارف خبايا اللحظة
ووحدة الكاس الأخير .. وطعم القهر الحقير
واغتراب الأب عن الطفل الصغير
واللص الجميل واللص الضرير
وعيون المريمات الجميلة ..
الحزينة .. العنيدة
محتاج مسيح زيك
عكس البلادة والعقول العنيدة
ليست هناك تعليقات:
إرسال تعليق