مقدمة مـُلحة
لا يهمني اسمك .. ولا لونك .. ولا جنسك
هي دي الليبرالية الحقيقية .. هي دي
الديمقراطية اللي متعرفش أبوها
حيث الإنسان هو القضية والإنسان هو الحل
حيث الكفاءة التي تتخطى كل عنصرية عقائدية
أو عنصرية لونية أو عنصرية جنسية.
الحلم الليبرالي الذي لا يعرف اللوبي
الصهيوني ولا اللوبي الفيومي
حيث العالم وطن واحد
سفينة واحدة تشتهي الحرية والعدالة
الحرية والعدالة للجميع
الدين لله والكرة الأرضية للجميع
" والله وعمالوها الرجالة "
" جوهري .. جوهري .. أوه .. أوه
"
ليلة امبارح مجاليش نوم .. أنا وأوباما
وكل الكون
الأوباميين الجـُدد
لأننا كنا متأكدين إننا هنهزم الماكينيين
الفاشيست المحاربين الدمويين
" انتصارنا .. انتصارنا .. انتصارنا
ضربة كانت من معلم .. اسود خلت أبيض بلم
"
والسواد هنا مش عنصرية لونية ولا أفريقية
السواد علامة نضال الكفاءة .. نضال البقاء
للأصلح
نضال الإنسان هو القضية والإنسان هو الحل
نضال إن الغاية لا تبرر الوسيلة
وإن الغايات المقدسة تحتاج لوسائل مقدسة
الحرية تحتاج لأحرار
والعدل يحتاج لعادلين
" اهري يا مهري .. اهري يا مهري
يا زملكاوي .. اوباما من أهلي "
سهرت وغنيت لأمريكا أم الدنيا الليبرالية
بحق وحقيقة
اللي مش بتفرق بين ابيض واسود
مسيحي أو مسلم أو بهائي بشرطة
أو بوذي أبو كرش
أمريكا بتاعت التعددية اللي بجد
وتداول السـُلطة السلمي اللي مفهوش دم
والانتخابات النزيهة من غير مراقبة قضاء
مستقل
ولا مجتمع مدني ولا مركز ابن خلدون ولا
يحزنون
أمريكا بتاعت الدين لله وأمريكا للجميع
أمريكا لكل الأمريكيين حتى لو كانوا
ماكينيين
" مشربتش من نيلها الأمريكي ..
جربت تغنيلها أفريقي
يا بتوع الوطن الأنتيكي "
أمريكا البيت الأبيض والرئيس الأسود
رئيس مجلس إدارة العالم
أمريكا .. اللي شالت خانة الديانة من
البطاقة من زمان
اللي اخترعت القانون الموحد لدور العبادة
عبادة يهودية .. ولا عبادة مسيحية
ولا عبادة إسلامية ولا بهائية
ولا عبادة بوذية
ده حتى عبادة الشيطان يا راجل ادوهم
تصاريح
لترميم دورات المياه الشيطانية
أمريكا اللي مفيهاش مواطن بشرطة
ولا مواطن على راسه بطحة
ولا مواطن على راسه ريشة
أمريكا .. بتاعت المواطنة اللي مفيهاش
غلطة
ولا حطة يا بطة ولا فلفل شطة
أمريكا .. حقوق الإنسان
ولا مؤاخذة حقوق الحيوان
وناسا .. والنعجة دولي .. والكاتشب
أمريكا .. الأديان السماوية
اليهودية .. والمسيحية .. والإسلام
والأديان الأرضية
البوذية .. والكنفوشسية .. والبهائية
والأقليات المؤثرة
والأكثرية المتحضرة
والدولة المحايدة
والدولة المحايدة
امريكا .. اليمين واليسار والنازيين
الجـُدد والليبراليين
والمحافظين والكل كليلة
والأصليين والمهاجرين
التخان .. والرفيعين
الطوال .. والقصيرين
أمريكا اللي معانا .. واللي مع التانيين
ملك وكتابة
طالعين أكلين .. نازلين أكلين
أمريكا .. بتاعت " لقد ولدنا الله
أحراراً
ولن نستعبد بعد اليوم "
أمريكا .. دولة القانون
وإشارات المرور اللي بجد
حمراء بجد .. وخضراء بجد
أمريكا مش الحزب الواحد
حتى لو كان متخيل نفسه أنه الحزب الوحيد
الوطني
وإن اربع سنين كافيين جداً للجلوس على
كرسي
وإلا هيحول الرئيس لمشلول
وكرسي الرئاسة لكرسي متحرك
أمريكا .. بتاعت الشعب اللي له الحق في حق
تقرير مصيره
اللي بيختار " شبيك لبيك يا أمريكي
حريتك بين ايديك
قرارك منك وليك
ومحدش مسئول عليك
أمريكا .. بتاعت عاش الهلال مع الصليب
وكونفوشيوس بالحليب
والبوذي مش غريب
واللي بيلعب في مناخيره عجيب
أمريكا .. بتاعت قول اديتنا ايه أمريكا
وقول هندي إيه لأمريكا
أمريكا .. وطني حبيبي الوطن الأكبر
يوم ورا يوم أمجاده بتكبر
وانتصاراته مليا حياته
أجمل عملة الدولار الأخضر
وطني حبيبي الوطن الأكبر
ليست هناك تعليقات:
إرسال تعليق