" باللهجة
الصعيدية "
متراهنش لما
تشوف خيل في سباجك عيان
متراهنش
لما تلاجي
عينيها في عينيك ومش شايفاك
متراهنش
لما تكون ايديها
في ايديك ومش حساك
متراهنش
لما يكسر البرد
عضامك وانت متخبي في أحضانها
متراهنش
لما تلاجي وهي
بتسمعلك صدى صوتك يرجعلك
متراهنش
الواحد اللي
مبيعرفش ينكت .. مينكتش
واللي مالوش حظ
ميضيعش العمر في لعب الطاولة
الزهر زي ما
بترميه بيديك .. وبياخد منك
وزي ما عمرك
شكله بيكبر.. برضه بينقص منك
فمتراهنش
لما تلاجي كل
غطاها يعريك
وجبال البرد في
جلبك تعلا فوجيك
متراهنش
لما تلاجي مركب
حلمك في المية يطـّوح يغرج
وهي واقفة ع
الشط تتفرج على مشهد حلمك
لما تلاجي نفسك
فجأة في الدنيا الضلمة
ومش شايف غير بس
عينيها
وتلاجي عينيها
مش شايفة غير بس الضلمة في عينك
متراهنش
لما تخط جواب
ليها تقراه وتكتب لك رد
تعرف منه ان
مفهمتش حروفك
ولا غاصت في
نهار معانيك
ولا عرفت سر
الداء الساكن فيك
متراهنش
للي ما يعرفش
يعوم عكس الموج ميعومش
اللي ميعرفش
يطير فوج الأسوار العالية ميطيرش
فمتراهنش
مش كل طين يتنحت
يتقال له كـُن
يتخلق منه غناوي
ولا كل من ركب
الحصان خيال .. فارس حكاوي
وكم رخيص بيراهن
عليه حد غالي
فمتراهنش
البوصة مهما
تلبسها عروسة
حرام تحلم بفارس
عريس
خيال مآتة شكله
عايش
شكله نابض
بالكلام
شكله بيهش
الغراب وبيحب الحمام
بس المفاجأة إن
خيال المآتة يا ناس
مالوش في الغرام
فمتراهنش
ليست هناك تعليقات:
إرسال تعليق